ગળ્યું ખાવાના શોખીન છો તો આ વખતે ઘરે જ તૈયાર કરો દૂધીની બરફી. થોડા સમયમાં જ તૈયાર થઈ જતી આ મીઠાઈ એકદમ સ્વાદિષ્ટ લાગશે અને તે વગર મહેનતે બનીને તૈયાર થઈ જશે, તો ચાલો જાણીએ દૂધીની બરફી બનાવવાની રેસિપી..
સામગ્રી
- 1 કિલો દૂધી
- 2 ચમચી ઘી
- 1 કપ દૂધ
- 1/2 કપ મિલ્ક પાવડર
- 4 ચમચી નાળિયેર છીણેલું
- 1/2 કપ ખાંડ
- એલચી પાવડર
- લીલો ફૂડ કલર (વૈકલ્પિક)
- બારીક સમારેલા ડ્રાયફ્રુટ
બનાવવાની રીત
દૂધીની બરફી બનાવવા માટે સૌથી પહેલા એક કિલો દૂધી લો. હવે દૂધીને છોલીને છીણીની મદદથી છીણી લો. હવે છીણેલી દૂધીમાંથી વધારાનું પાણી કાઢી લો. ત્યારબાદ એક કડાઈને મધ્યમ આંચ પર રાખો અને તેમાં 2 ચમચી ઘી ગરમ કરો. હવે કડાઈમાં છીણેલી દૂધી ઉમેરો અને સતત હલાવતા રહીને મિક્સ કરો.
ત્યારબાદ કડાઈને ઉપરથી ઢાંકી દો અને 3-4 મિનિટ પકાવો. 3-4 મિનિટ પછી ઢાંકણને હટાવીને તેમાં 1 કપ દૂધ અને 1/2 કપ ખાંડ ઉમેરીને બરાબર મિક્સ કરો.
હવે ફરીથી ઢાંકણ ઢાંકીને ધીમી આંચ પર પકાવો. થોડીવાર પછી ઢાંકણ હટાવી લો અને તેમાં 1/2 કપ મિલ્ક પાવડર, 4 ચમચી છીણેલું નાળિયેર અને 1/2 ચમચી એલચી પાવડર નાખીને ધીમી આંચ પર સારી રીતે મિક્સ કરો.
હવે તેમાં 2 ચપટી ગ્રીન ફૂડ કલર અને ઝીંણા સમારેલા ડ્રાય ફ્રુટ્સ ઉમેરીને બરાબર મિક્સ કરો. હવે તેમાં 1 ચમચી ઘી ઉમેરો. થોડીવાર સુધી પકાવો.
ત્યારબાદ એક ટ્રે લો અને તેને ઘી વડે ગ્રીસ કરો. હવે ગેસ બંધ કરીને આ મિશ્રણને ટ્રેમાં નાખીને ફેલાવી દો. હવે તેને સેટ થવા માટે 1 કલાક માટે ફ્રિજમાં રાખો. થોડા સમય બાદ ટ્રેને ફ્રિજમાંથી બહાર કાઢીને બરફીના ટુકડા કરી લો. તો તૈયાર છે દૂધીની બરફી…