જોશીમઠમાં આ કારણે પાતળા થઈ રહ્યા છે ભગવાન નૃસિંહના હાથ, જાણો શું છે પૌરાણિક કથા.
જોશીમઠના નૃસિંહ મંદિરમાં ભગવાન વિષ્ણુના ચોથા અવતાર નૃસિંહની મૂર્તિ શાંત મુદ્રામાં સ્થાપિત છે. તે મૂર્તિની એક બાજુ સમય સાથે પાતળી થતી જઈ રહી છે. જેના ઘણા કારણો સામે આવ્યા છે, તો ચાલો જાણીએ ભગવાન નૃસિંહના હાથ પાતળા થવા પાછળની પૌરાણિક કથાઓ વિશે.
આદિગુરુ શંકરાચાર્યે સ્થાપના કરી હતી :
એવું માનવામાં આવે છે કે ભગવાન નૃસિંહના આ મંદિરની સ્થાપના આદિગુરુ શંકરાચાર્ય દ્વારા કરવામાં આવી હતી. કારણ કે તેઓ ભગવાન નૃસિંહને તેમના ઇષ્ટદેવ માનતા હતા. આ મંદિરમાં આદિગુરુ શંકરાચાર્યની ગાદી પણ છે. આ મંદિર લગભગ હજારો વર્ષ જૂનું છે અને ભગવાન બદ્રીનાથ શિયાળામાં આ ગાદી પર આવીને બિરાજે છે. એવું પણ કહેવાય છે કે ભગવાન નૃસિંહના દર્શન વિના બદ્રીનાથની યાત્રા પૂર્ણ માનવામાં આવતી નથી. એટલા માટે આ મંદિરને નૃસિંહ બદ્રી પણ કહેવામાં આવે છે.
નર-નારાયણ પર્વતનું મિલન થાય ત્યારે બદ્રીનાથના દર્શન નહીં થાય!
મંદિરમાં સ્થાપિત કરેલી ભગવાન નૃસિંહની મૂર્તિના જમણા હાથની ભુજા પાતળી છે અને તે દર વર્ષે ધીમે ધીમે પાતળી થતી જઈ રહી છે. કહેવામાં આવી રહ્યું છે કે એક દિવસ ભગવાન નૃસિંહનો આ હાથ તૂટીને પડી જશે. જે દિવસે આ ઘટના બનશે તે દિવસે અહીં સ્થિત નર અને નારાયણ નામના પર્વતો એક થઈ જશે અને ભગવાન બદ્રીનાથના દર્શન નહીં થાય. ત્યારે જોશીમઠના તપોવન ક્ષેત્રમાં ભવિષ્ય બદ્રી મંદિરમાં બદ્રીનાથના દર્શન થશે.
આ જગ્યા શ્રાપિત છે :
જોશીમઠની પૌરાણિક કથા અનુસાર એક સમયે અહીં વાસુદેવ નામના રાજા રાજ કરતા હતા. એક દિવસ તે રાજા શિકાર રમવા જંગલમાં ગયા. તે જ સમયે, ભગવાન નૃસિંહ રાજાના મહેલમાં પહોંચ્યા અને રાણી પાસે ભોજન માંગ્યું. ત્યારબાદ રાણીએ આદરપૂર્વક ભગવાનને ભોજન અર્પણ કર્યું. ભોજન કર્યા પછી, રાણીએ ભગવાનને રાજાના પલંગ પર આરામ કરવા કહ્યું.
આ દરમિયાન, રાજા શિકાર પરથી પાછા ફર્યા અને પોતાના આરામ ખંડમાં પહોંચ્યા. રાજાએ જોયું કે એક માણસ તેમના પલંગ પર સૂતો હતો. રાજા ગુસ્સાથી લાલ થઈ ગયા અને ક્રોધમાં આવીને તેણે તલવાર વડે માણસ પર પ્રહાર કર્યો. ભગવાન પર તલવારનો પ્રહાર થતાં જ તેમના હાથમાંથી લોહીને બદલે દૂધ વહેવા લાગ્યું અને તે માણસ ભગવાન નૃસિંહના રૂપમાં ફેરવાઈ ગયો.
રાજાને પોતાની ભૂલ સમજાઈ અને માફી માંગવા લાગ્યા. ભગવાન નૃસિંહે કહ્યું કે – તમે કરેલા અપરાધની સજા એ છે કે તમે તમારા પરિવાર સાથે જોશીમઠ છોડીને કત્યૂરમાં જઈને વસો. સાથે જ ભગવાને કહ્યું કે તમારા પ્રહારની અસરથી મંદિરમાં મારી મૂર્તિની એક બાજુ પાતળી થતી જશે અને જે દિવસે તે પાતળી થઈને પડી જશે તે દિવસે રાજવંશનો અંત આવશે.
નોંધ: અહ્યા અપાયેલી માહિતી ધાર્મિક અને લોક માન્યતા પર આધારિત છે. આનું કોઈ વૈજ્ઞાનિક પુરાવો નાં હોઈ સકે. સામાન્ય હિત અને માહિતી ને ધ્યાન માં રાખીને અહ્યાં આ માહિતી ને અમે પ્રસ્તુત કરી રહ્યા છીએ.
