IND VS BAN 2ND ODI Match 2022 Score: મહેદી હસન મિરાજની શાનદાર સદી(100) અને મહમુદુલ્લાહ (77)ની અડધી સદીની મદદથી બાંગ્લાદેશે ભારત સામે બીજી વન-ડેમાં 5 રને વિજય મેળવ્યો છે. બાંગ્લાદેશે 50 ઓવરમાં 7 વિકેટે 271 રન બનાવ્યા હતા. જવાબમાં ભારત 50 ઓવરમાં 9 વિકેટે 266 રન બનાવી શક્યું હતું. આ જીત સાથે બાંગ્લાદેશે ત્રણ મેચની શ્રેણીમાં 2-0થી અજેય સરસાઇ મેળવી લીધી છે. ભારત અને બાંગ્લાદેશ વચ્ચે 10 ડિસેમ્બરે ત્રીજી વન-ડે રમાશે.
બાંગ્લાદેશ 2015 પછી હવે 2022માં ભારત સામે કોઇ શ્રેણી જીતવા સફળ રહ્યું છે. બાંગ્લાદેશે ટોસ જીતીને પ્રથમ બેટિંગ કરવાનો નિર્ણય કર્યો હતો. અનામુલ હક 11, લિટ્ટન દાસ 7 અને શાકિબ હસન 8 રને આઉટ થતા બાંગ્લાદેશની શરૂઆત ખરાબ રહી હતી. એકસમયે 69 રનમાં 6 વિકેટ ગુમાવી દીધી હતી. અહીંથી મહમદુલ્લાહ અને મહેદી હસને બાજી સંભાળી હતી. બન્નેએ સાતમી વિકેટ માટે 148 રનની ભાગીદારી નોંધાવી હતી. ભારત તરફથી વોશિંગ્ટન સુંદરે 3 વિકેટ, જ્યારે મોહમ્મદ સિરાજ અને ઉમરાન મલિકે 2-2 વિકેટ ઝડપી હતી.
ઇજાગ્રસ્ત રોહિત શર્માની લડાયક બેટિંગ
જવાબમાં લક્ષ્યાંકનો પીછો કરવા ઉતરેલી ભારતીય ટીમની શરૂઆત ખરાબ રહી હતી. વિરાટ કોહલી, શિખર ધવન અને કેએલ રાહુલ સસ્તામાં આઉટ થયા હતા. આ પછી શ્રેયસ ઐયરે 82 અને અક્ષર પટેલે 56 રન બનાવી બાજી સંભાળી હતી. આ પછી ઇજાગ્રસ્ત રોહિત શર્મા નવમાં ક્રમાંકે બેટિંગમાં આવ્યો હતો અને 28 બોલમાં આક્રમક 51 રન ફટકાર્યા હતા. જોકે તે ટીમને જીત અપાવી શક્યો ન હતો.
બાંગ્લાદેશ તરફથી ઇબાદત હુસૈને સૌથી વધારે 3 વિકેટો ઝડપી હતી. મહેદી હસન અને શાકિબ અલ હસનને 2-2 વિકેટ મળી હતી.
નોંધ: આ લેખ માં આપેલી તમામ માહિતી માત્ર જાણકારી નાં ઉદ્દેશ્ય થી આપવામાં આવી છે
